العيوب دي معروفة في الموديل، ومش معناها إنها موجودة في كل عربية. الفحص هو اللي بيقولك العربية اللي قدامك فيها إيه.
عشان كده هنا هنقسم الكلام حسب الجيل والموتور، ونقولك على المشاكل اللي اتكررت في شكاوى الملاك والمراجعات، وإزاي تتأكد منها قبل ما تحط فلوسك في عربية ألماني تمن صيانتها عالي.
الـ 320i هي الفئة الأشهر من الفئة الثالثة. الجيل E90 اتنتج من 2005 لـ 2012 بموتور 2000 سي سي من غير تيربو، وبعده الجيل F30 من 2012 لـ 2019 بموتور 2000 تيربو.
في سبتمبر 2019 اتطرح الجيل G20 في مصر بموتور 2.0 لتر تيربو قوة 184 حصان وفتيس ستيبترونيك أوتوماتيك 8 سرعات. وأغلب العربيات المعروضة مستعمل في مصر أوتوماتيك.
كل اللي جاي جاي من شكاوى ملاك ومراجعات متخصصة في عربيات بي ام، ومش شرط يكون في كل عربية. عربية متصانة في توكيل أو مركز متخصص بسجل واضح بتكون في حتة تانية.
رتبنا المشاكل من الأخطر للأخف، ولكل مشكلة مكتوب الجيل أو الموتور اللي بتظهر فيه، وعلاماتها، وإزاي بنكشف عليها.
في F30 الأولاني، موتور N20 اشتهر بمشكلة مط الجنزير وكسر الدلايل البلاستيك، والمشكلة مرتبطة بتاريخ الإنتاج أكتر من الكيلومترات. وموتور N46 في E90 برضه كان عنده مشاكل جنزير وشدادات.
العلامات: صوت شخللة أو تكتكة أول ما الموتور يدور وهو بارد، أو صفير بين 1500 و 2500 لفة، ورعشة في السلانسيه. في الحالات الصعبة الموتور ممكن يفصل فجأة.
بنشغل العربية بعد ما تكون واقفة ساعات، ونقرا أعطال توقيت الكامة بالكمبيوتر. ولو العربية من 2012 لـ 2015، بنسأل عن فاتورة تغيير الجنزير.
إزاي تكشف عليها: تشغيل على البارد والاستماع لأول ثواني مع قراءة أعطال توقيت الكامة
العربيات دي بتشتغل بطلمبة مية كهربا، ومعاها وش ترموستات وقربة تمدد وخراطيم بلاستيك. البلاستيك بيقسى مع الحرارة وبيشرخ، وفي موتور B48 الجيل الجديد خراطيم رجوع المية اشتكى منها ملاك كتير.
العلامات: رسالة نقص مية، ريحة حلوة بعد السواقة، أثر سايل التبريد قدام الموتور، أو رسالة عطل في نظام الدفع والعربية تدخل وضع الطوارئ.
بنكشف على القربة والخراطيم والطلمبة، ونقرا أعطال نظام التبريد بالكمبيوتر، ونراقب الحرارة في تجربة طويلة. نقص المية والسخونية ممكن يأذوا جوان وش السلندر أو التيربو.
إزاي تكشف عليها: مستوى المية ومكان التسريب وقراءة أعطال الطلمبة والحرارة
في موتور B48 فيه شكاوى متكررة من شرخ في وش فلتر الزيت، فيبدأ يسرب زيت أو مية. المشكلة إن الوش تحت المانيفولد، فتغييره شغلانة كبيرة.
العلامات: نقط زيت أو مية تحت العربية، نقص في الزيت أو المية من غير سبب واضح، وأحيانًا ريحة زيت محروق.
بنكشف على أسفل الموتور وحوالين الوش بكشاف، وبنبص على الزيت والمية نتأكد إنهم مش مختلطين. ولو فيه تسريب، بنحسب تكلفته قبل ما تتفق على السعر.
إزاي تكشف عليها: دور على زيت أو مية تحت المانيفولد وعلى الحاجة اللي تحت الموتور
جوان غطا البلوف من أشهر نقط التهريب في مواتير بي ام الأربع سلندر، وفي B48 الـ PCV جزء من غطا البلوف نفسه، فلما يتعب بيتغير الغطا كله.
العلامات: ريحة زيت محروق، دخان خفيف من ناحية المانيفولد، ونقص الزيت بين الغيارات. ولو الزيت وصل لحساس عمود الإكسنتريك، العربية ممكن تهنج أو تفصل.
بنكشف على حواف الغطا بعد تجربة الطريق، ونقرا أعطال الفالفترونيك. التهريب البسيط مش كارثة، لكن لازم يدخل في حسبة السعر.
إزاي تكشف عليها: افتح الكبوت بعد التجربة ودور على ريحة أو دخان من ناحية الشكمان
موتور N46 في E90 معروف إن جلد البلوف والشنابر بيتآكلوا مع السن، فيبدأ ياكل زيت. وفي F30 ممكن يحصل استهلاك بسبب الـ PCV أو جلد البلوف.
العلامات: دخان أزرق بعد ما العربية تقف في السلانسيه شوية ثم تدوس، ولمبة الزيت تنور بين الغيارات.
بنسيب العربية في السلانسيه وبعدين نعلي اللفات ونراقب الشكمان، وبنكشف على البوجيهات. ولو صاحبها بيقول إنه بيزود زيت كل شوية، خد الكلام بجد.
إزاي تكشف عليها: اسأل عن معدل تزويد الزيت وبص على الشكمان بعد الوقوف في السلانسيه
ماسورة الهوا اللي بين التيربو والمانيفولد بلاستيك، ومع الحرارة ممكن تشرخ. هي قطعة مش غالية، لكن بتعمل أعراض تخض.
العلامات: العربية تفقد العزم فجأة، لمبة الموتور تنور، صوت تنفيس عالي وانت بتدوس، وممكن تدخل وضع الطوارئ.
في تجربة الطريق بندوس للآخر على سرعات مختلفة، وبنقرا أعطال ضغط التيربو، وبنبص على المواسير والخراطيم بنفسنا.
إزاي تكشف عليها: تجربة طريق مع دوس كامل وقراءة أعطال ضغط التيربو
في E90 فيه أعطال كهربا معروفة: قفل الدريكسيون الكهربا بيطلع رسايل، وريليه الدخول الذكي ممكن يفصل ويوقف العربية، والبطارية الجديدة لازم تتبرمج على العربية.
العلامات: لمبة دريكسيون برتقاني أو أحمر في التابلوه، العربية مش راضية تدور، أو مشاكل في الشاشة وطلمبة الفاكيوم بتاعة الفرامل.
بنقرا كل وحدات العربية بالكمبيوتر مش الموتور بس، وبنجرب الفرامل والإحساس بالدواسة، وبنتأكد إن البطارية متسجلة صح.
إزاي تكشف عليها: جرب الدريكسيون والدخول الذكي والشاشة، واقرا كل الوحدات بالكمبيوتر
كل النقط دي جزء من فحص جرانتي على 210 نقطة، وبتستلمها في تقرير مكتوب. اعرف أكتر عن مركز فحص سيارات بي ام دبليو.
لو بتدور على عيوب بي ام دبليو 320i 2006 أو 2007 أو 2010 فدي E90 بموتور من غير تيربو. موديلات 2015 و 2017 و 2018 من F30 بموتور تيربو. ومن 2020 لـ 2026 جيل G20.
موديل 2019 بالذات ممكن يكون F30 أو G20، لأن الجيل الجديد نزل مصر في سبتمبر 2019. شكل الفوانيس والتابلوه بيفرقهم، وكود الشاسيه في رقم الشاسيه بيأكد.
موتور 2000 سي سي أربع سلندر من غير تيربو (N46، وبعدين N43 في بعض الأسواق من 2007)، وفتيس أوتوماتيك في أغلب المعروض. واتعمله تجديد في أواخر 2008.
ركز على استهلاك الزيت والتهريب وجنزير الكامة، وعلى أعطال الكهربا زي قفل الدريكسيون. ولأن السن كبير، العفشة والمساعدين غالبًا محتاجين كشف دقيق.
أول 320i بموتور تيربو 2000. من 2012 لأوائل 2015 كان موتور N20، وبعد التجديد اتغير لموتور أحدث بجنزير محسن.
لو العربية قبل 2015 الجنزير هو أهم حاجة. وفي كل السنين اكشف على التبريد والطلمبة الكهربا وتسريب غطا البلوف وماسورة التيربو.
الجيل الحالي بموتور 2.0 تيربو 184 حصان وفتيس 8 سرعات، واتطرح في مصر في سبتمبر 2019.
أشهر شكاوى موتور B48 شرخ وش فلتر الزيت وخراطيم المية وغطا البلوف. العربيات الحديثة لسه كتير منها في الضمان، فاسأل عن سجل التوكيل.
الـ 320i من أمتع العربيات في السواقة في فئتها، ثابتة وموزونة، والمواتير التيربو الحديثة فيها عزم كويس من لفات واطية. والتجهيزات والأمان أعلى من عربيات كتير في نفس السعر.
هي اختيار يستاهل لو عرفت نقط ضعف الجيل اللي بتشتريه، ولقيت سجل صيانة واضح، وعملت فحص كامل بالكمبيوتر وتجربة طريق قبل ما تدفع.
كل النقط اللي فاتت هي بالظبط اللي بنركز عليه وإحنا بنفحص عربية زي بي ام دبليو 320i، وهي جزء من الفحص الشامل للعربية المستعملة اللي بيغطي 210 نقطة. الفحص بياخد من نص ساعة لساعة، وبتستلم بعده تقرير مكتوب.
بنعمل كشف بالكمبيوتر على العربية يطلع أعطال الفتيس والموتور والحساسات المتسجلة، ونقيس سمك الدهان عشان نعرف الرش والحوادث، ونفحص شاسيه العربية والعفشة، وبعدين تجربة طريق. وعندك ضمان 24 ساعة بعد الفحص.
تقدر تيجي المركز في مدينة نصر كل يوم من 12 الضهر لـ 12 بالليل، أو المهندس ييجي لمكان العربية في القاهرة الكبرى والجيزة. ولو لسه بتقارن الأسعار، شوف سعر بي ام دبليو 320i المستعملة حسب سنة الصنع.
دي أكتر الأسئلة اللي بتتسأل عن نقط ضعف بي ام دبليو 320i قبل الشراء.
الإجابات مختصرة، ولو فيه عربية معينة قدامك، الفحص هو اللي بيقولك حالتها الحقيقية.
أشهرها تسريب التبريد وطلمبة المية الكهربا، وتهريب الزيت من غطا البلوف ووش الفلتر، وجنزير الكامة في موتور N20 من 2012 لأوائل 2015. وفي E90 استهلاك الزيت وأعطال الكهربا. المشاكل بتختلف حسب الجيل، فلازم تعرف عربيتك من أنهي جيل الأول.
320i 2015 من جيل F30، ولو اتصنعت قبل تحديث الموتور ممكن تكون بموتور N20 اللي اشتهر بمشكلة مط الجنزير وكسر الدلايل. اسمع الموتور على البارد واسأل عن فاتورة الجنزير، واكشف على التبريد وتسريب الزيت وماسورة التيربو.
دي من جيل G20 بموتور B48، وهو أمتن من اللي قبله. أشهر الشكاوى عليه شرخ وش فلتر الزيت، وخراطيم رجوع المية، وغطا البلوف مع الكيلومترات. اسأل عن سجل التوكيل والضمان، واكشف على أسفل الموتور كويس.
ممكن تستاهل لو حالتها كويسة، لكنها E90 عمرها أكتر من 15 سنة. ركز على استهلاك الزيت والتهريب وصوت الجنزير، وأعطال الكهربا والعفشة. عربية زي دي الفحص بيحدد هي فرصة ولا مصاريف مش هتخلص.
موديل 2019 ممكن يكون F30 أو G20، لأن الجيل الجديد نزل مصر في سبتمبر 2019. الفوانيس والشاشة والتابلوه بيفرقوا بينهم بسهولة، ورقم الشاسيه بيأكد الكود. الفرق مهم لأن مشاكل كل جيل مختلفة.
جمعنا تجارب الملاك والمراجعات والاستدعاءات الرسمية، واعتمدنا بس العيوب اللي اتكررت في مصدرين على الأقل. الكلام مكتوب من فريق جرانتي.
اطمن قبل ما تدفع فلوسك. كلمنا وقول لنا نوع العربية ومكانها، وإحنا نظبط الميعاد ونحدد السعر قبل ما نتحرك.
المهندس بيفحص العربية قدامك وبتستلم تقرير مكتوب بكل اللي اتلاقى.
كلمنا على 01222373204
قبل ما تدفع في العربية، اعرف إزاي فحص سيارات قبل الشراء بيكشفلك العيوب المخفية قبل ما توقع.